De conventu climatico

Postridie Nonas Novembres plus quadraginta (40) principes civitatum in urbem Belem de Para, ubi paucis post diebus maximus conventus climaticus Nationum Unitarum habebitur, congregati sunt. Propositum est, ut curetur, ne globus terrestris plus uno et dimidio (1,5 °C) gradu Celsiano calefiat.

Praesidens Luiz Inácio Lula da Silva, hospes conventus, verbis gravissimis pro combustibilibus fossilibus deponendis appellavit, etsi regimen eius petroleum in litore Amazoniae quaerendum esse censet. Lula, inconstantiam orationum agnoscens, conventui illi “veritatis” nomen dedit necnon eos vituperavit, qui bonum publicum propriis commodis anteponerent.

Antonius Guterres, secretarius generalis Nationum Unitarum, de rerum imminenti necessitate serio monuit: “Data est nobis”, inquit, “facultas eligendi, utrum ducamus an pereamus”. Gabriel Boric autem, praesidens Chiliae, id praesidenti Civitatum Americae Unitarum vitio dedit, quod mutationem climaticam negaret.

In medio colloquio regimen Brasiliae rogationes ambitiosas fecit. Aerarium centum viginti quinque miliardorum dollarorum ($125 miliarda), quo silvae curentur, condendum esse censet. Suasit etiam ut mille trecenta miliarda ($1,3 milia miliarda) dollarorum colligerentur, quae ad condicionem climatis in melius mutandam spectarent. Quae pecunia vectigalibus ditissimorum auctis erogaretur.

(Scripsit Alex Augusto Marcelo)