Funus Barbarae Borges celebratum

Barbara Elisa Yabeta Borges, virgo duodetriginta annorum, quae die Veneris (31) post meridiem sclopeto occisa est, hodie sive postridie Kalendas Novembres (02/11) in Coemeterio Iraiensi effertur. In caput exitialiter percussa est, cum greges criminales in Via Flava, in regione septentrionali urbis Fluminis Ianuarii, violentissime confligerent.

Barbara autocineto per applicationem telephonicam arcessito ab Insula Gubernatoris ad Cachambi vehebatur, cum vehiculum prope Complexum Marensem (vulgo “Complexo da Maré”) transiens in sclopetationem incidit. Quae, quamvis statim ab autoraedario ad Nosocomium Foederale Bonsucessense vecta sit, tamen vulneribus acceptis de vita decessit. In eadem sclopetatione alter vir vulneratus atque in nosocomium deportatus est.

Secundum victimae familiares, Barbara, quae paulo ante ad altiorem operis gradum ascenderat — nam in argentaria munere fungebatur —, proximo anno ventrem ferre in animo habebat. Paucis quidem horis ante mortem, in retibus socialibus sententiam seriam de vitae hominumque pretio divulgaverat: ‘quod magni pretii sit, cum abeat, partem nostri secum auferre’.

Vigiles militares loco conflictus sclopetum automaticum invenerunt. Servitium Delationum (vulgo “Disque Denúncia”) informationem de sceleris auctoribus colligit.

(Scripsit Alex Augusto Marcelo)