Navis aeroplanigera omnium maxima in Americam Latinam pervenit

Navis nomine “USS Gerald Ford”, quae omnium navium aeroplanigerarum et maxima et recentissima habetur, die Martis (11/11) in regionem operationum, quae vocatur, Americae Latinae pervenit, ut ex classe Americana officialiter nuntiatum est. Nave iussu praesidentis Donald Trump adveniente pressio militaris in regimen Nicolai Maduro, qui in Venetiola potestatem tenet, valde aucta est.

Tanta est machina, ut eam parem arci natanti esse diceres: trecenta triginta duo (332) metra longa est, vi nucleari propellitur et nonaginta (90) aeroplana capere potest. Haec navis ingens, quae non ante quam anno bismillesimo septimo decimo (2017) in usum recepta est, classi crescenti adiungitur, quae ex navibus bellicis, aeroplanis F-35 navique submarina nucleari constat. Pentagon, ministerium defensionis Americanorum, affirmat operationem eo spectare, ut contra mercaturam drogarum pugnetur.

Cui rei respondens, Maduro dixit regimen Civitatum Americae Unitarum rebus Venetiolae interioribus intervenire temptare. Praeterea nuntiavit se exercitus suos quam maxime parare. Contentionem inter utramque civitatem auget, quod a mense Septembri Civitates Americae Unitae undeviginti (19) impetus fecerunt in naves de mercatura drogarum suspectas, quo factum est, ut septuaginta sex (76) homines interirent. Quae cum ita sint, timendum est, ne regimen praesidentis Trump operationes terrestres suscipiat. Adventus USS Ford planum signum habetur Americanos potentiam militarem inauditam Caracis ostendere velle.