Oppidum in Parana turbine venti vastatum

Die Veneris (07/11) turbo venti oppidum Flumen Formosum Iguaçu (vulgo Rio Bonito do Iguaçu) in Parana saeviit. Phaenomenon, quod a meteorologis perniciosissimum historiae recentioris civitatis Paranae describitur — nam vis turbinis tres gradus in scala Fujitana effecit —, in supercellula tempestatis cyclone extratropico propulsum paucis secundis ortum est. Tanta fuit calamitas, ut nonaginta centesimae regionis oppidi urbanae delerentur.

Eventus calamitatis tragicus est: sex (6) homines vitam amiserunt et plus septingenti septuaginta (770) vulnerati sunt. Inter victimas est Julia Kwapis, puella quattuordecim annorum, quae Sacramentum Confirmationis hoc die Sabbati acceptura erat. Vi ventorum immani domus funditus e solo evulsae sunt. Praeterea, maxima pantopolia in oppido corruerunt.

Praesidens Lula per servitium X ob mortuos se valde dolere dixit et solidarietatem incolis ostendit. Manus auxiliaria foederalis a ministra Gleisi Hoffmann ducta, ministeriis Salutis et Integrationis adiuvantibus, in regionem afflictam missa est, quae auxilium humanitarium quam celerrime ferret.

Gubernator Ratinho Junior statum calamitatis publicae indixit ad auxilium expediendum. Dum complura centena hominum tecto privatorum locis fortuitis excipiuntur, regimen provinciale proposuit, ut subventio oeconomica etiam quinquaginta milium realium (R$ 50.000) singulis familiis ad arduam reaedificationem daretur.

(Scripsit Alex Augusto Marcelo)