Plures Mariae in Brasilia quam urbis Sancti Pauli incolae

Die Martis (04/11) Institutum Brasilianum Geographiae et Statisticae, quod breviter IBGE appellatur, percontationem “Nomina in Brasilia”, ordine secundam, divulgavit, datis census anni bismillesimi vicesimi secundi (2022) renovatam. Res nova est, quod index nominum gentilium in civitate frequentissimorum inclusus est.

“Silva” longe primum locum obtinet, cum triginta quattuor milionibus (34.000.000) Brasilianis nomen gentile sit. Qui numerus septentecim fere centesimas (17%) incolarum aequat. Secundo loco positum est “Santos”, tertio “Oliveira”.

Inter praenomina, principatum servat “Maria” (plus duodecim miliones), sequente “José” (amplius quinque miliones). “Maria” tanta apud Brasilianos gratia valet, ut numerus feminarum quae ita nominantur totum populum urbis Sancti Pauli superet.

Percontatio, quae plus centum quadraginta milia (140.000) praenominum et ducenta milia (200.000) nominum gentilium scrutata est, progressus quoque ostendit. “Osvaldo” et “Terezinha” in desuetudinem abire videntur. “Gael” autem et “Helena” apud iuniores gratiam adipiscuntur. Nomina, quae non plus vicies in civitate occurrunt, secreto statistico servantur.

Index decem nominum apud Brasilianos gratissimorum:

1. Maria: 12.284.478
2. José (Lat. “Iosephus”): 5.164.752
3. Ana (Lat. “Anna”): 3.948.650
4. João (Lat. “Ioannes”): 3.430.608
5. Antônio (Lat. “Antonius”): 2.241.094
6. Francisco (Lat. “Franciscus”): 1.665.494
7. Pedro (Lat. “Petrus”): 1.624.478
8. Carlos (Lat. “Carolus”): 1.474.492
9. Lucas: 1.341.525
10. Luiz (Lat. “Ludovicus”): 1.335.098