Trump dies Maduri numeratos esse dicit

Donald Trump, praesidens Civitatum Americae Unitarum, inter colloquium diurnariis societatis BBC datum affirmavit dies Nicolai Maduri potestatem in Venetiola tenentis numeratos esse. Quam declarationem eodem tempore divulgavit, quo tensione aucta mare Caribicum magis quam umquam ante apparatu militari Americano occupatum est. In numero machinarum est navis aeroplanorum vectoria USS Gerald Ford.

Operatio officialiter eo spectat, ut contra mercaturam drogarum pugnetur. Series tamen ictuum ab Americanis in naves ibi suspectas, cum iam plus sexaginta mortes fecisset, a Nationibus Unitis supplicia extraiudicialia appellata est.

Regimen Venetiolae eum apparatum militarem minationem provocationemque habet, qui ad rerum eversionem spectet. Trump quidem ambigue indicavit impetus terrestres brevi fieri posse.

Praesidente Americano urgente, Madurus auxilium militare a Russia, Sinis Iraniaque petivit, cum significavisset se, dummodo cautiones cum de amnestia tum de participatione fautorum Chavistarum in mutatione darentur, ad consultationes agendas paratum esse. Quae cum ita sint, Trinitas et Tabacum, terra vicina, exercitum suum quam maxime praemonuit paravitque.

(Scripsit Alex Augusto Marcelo)